நவீன பாரதம்

தீமை கண்டு தீயாய் எழுவோம்!

Friday, January 16, 2009

சுரணையை அடகு வைத்து அரியாசணம்

சுரணையை அடகு வைத்து
ஆளுகின்றோம் அரியாசணம்!
தமிழினத்தை ஒழித்துவிட்டு
தமிழினத்தைக் காத்திடலாம்!

ரத்தச் சகதிகளில்
சொந்தமெலாம் வீழ்ந்திருக்க
பதுங்கு குழிகளிலே
மழலைகளும் ஒளிந்திருக்க

குண்டுகள் வீசிடுவார்!
கொன்று குவித்திடுவார்!
பிணங்களையும் வன்புணர்ந்து
பேருவகை அடைந்திடுவார்!

தேடுபொறிக் கருவிகளையும்
தேர்ச்சி பெற்ற பயிற்சிகளையும்
அனுப்பி வைப்போம்
இங்கிருந்து!
நம் கண்ணைக் குத்துதற்கு
நம் விரல்களே உகந்ததன்றோ!

ஈழத்துச் செய்தியெல்லாம்
இருட்டடிப்புச் செய்துவிட்டு
திரையுலகப் பிரபலங்களுடன்
கலைவிழா கண்டிடுவோம்!

செய்தித்தாளில் கூட
வெள்ளித்திரை வேணும் நமக்கு!
வெள்ளித் திரை இல்லையெனில்
வாங்கிட எவர் வருவார்!

இன்னும் கொஞ்சம் உறங்கிடுவோம்!
இப்போதே அவசரமா?
மொத்த இனமும் அழிந்துவிடட்டும்!
மொத்தமாய் விசாரித்துக் கொள்வோம்!

Tuesday, July 22, 2008

ஆட்டங் காணுதோர் ஆட்சி!

ஆட்டங் காணுதோர் ஆட்சி! ஆளும்
கணவான்கள் கண்ணிலே பறக்குதோர் பூச்சி!
காய்கறி விலையெல்லாம் ஜூட்டு! இங்கே
ராக்கெட்டாய் பறக்குது எம்பிக்கள் ரேட்டு!

வல்லான் ஒருவனை நாடி - அணு
ஆயுதச் சக்தியைக் கோரும் - மந்திரி
ஐயாமாரே கொஞ்சம் கேளீர் - ஏழைத்
தொழிலாளி தட்டிலே எங்கேதான் சோறு?

நம் நாட்டு சேதியவன் தெரிஞ்சிகிட்டு
வாங்கிய பணமெல்லாம் கட்டு கட்டு
அவன் சொல்வதையெல்லாம் நாம் கேட்டுகிட்டு
நம் நிலை என்னன்னு பறை கொட்டு கொட்டு! - இன்று
நம் நிலை என்னன்னு பறை கொட்டு கொட்டு!

Tuesday, July 17, 2007

தலை கேட்கும் துரோணாச்சாரியர்கள்!

கட்டை விரல்
கேட்டபோது கூட
கஷ்டப் பட்டதில்லை
எங்கள் ஏகலைவன்கள்!

இன்று தலையோடு
சேர்த்துத் தன்
தகப்பன் தலையையும்
தட்சணையாய்க் கேட்கும்
துரோணாச்சாரியார்கள்
ஆனதென்ன கல்விக் கூடங்கள்!

இந்திய அரசே!
இந்திய அரசே!
கல்வி எங்களுக்குப்
பிறப்புரிமை!

கண்டபடி உயரும்
கல்விக் கட்டணத்தால்
எம்மைப் போல்
ஏழைகளுக்கு
எட்டாக் கனியாக்கிவிடாதே
கல்வியை!

கார்ப்பரேஷன் பள்ளிவரை
கஷ்டப் பட்டு
படித்து விடுகிறோம்!
எதிர்காலக் கல்விக்காய்
நாங்கள்
ஆசைப் படக் கூடாதா!

வருங்கால விஞ்ஞானிகள்
ஆகும் வாய்ப்பு
எங்களுக்கும் இருக்கிறது!

பத்தாம் வகுப்போடும்
பண்ணிரெண்டாம் வகுப்போடும்
மூட்டை கட்டி வைக்க
வேண்டுமா
எங்கள் கனவுகளை?


எத்தனை பேர்
எத்தனை பேர்
பன்னிரெண்டாம் வகுப்போடு
கல்விக்கு முழுக்குப்
போடுகிறோம்!
கல்வி எங்களுக்கு
கசந்து போயிற்றா?
அல்லவே!
கட்டுவதற்கு இருக்கும்
மாற்று உடுப்பைக்
கூட
விற்றுத்தான்
தொடரவேண்டுமா
எங்கள் மேல்படிப்பை?


உந்து சக்தி: வசதியாக மறந்துவிட்டோம் : செல்வேந்திரன்

Sunday, June 17, 2007

மனதை என்று சுத்தம் செய்வாய்?




பள்ளரென்றும் பறையரென்றும்
பாகுபாடு தந்துவிட்டு
ஆதிமுதல் சாதி காட்டி
அல்லல் எமக்குத் தந்ததென்ன?


பிரம்மனவன் யோனிவழி
பிறந்தவர்கள் நாமென்றால்
பிரம்மனவன் பிறப்பின்வழியும்
எதுவென்றே நீர் கூறுவீரோ?


எம் உழைப்பில் காணா தீட்டை நீயும்
உறவில் மட்டும் உணர்வதென்ன? - நாம்
உழைத்துக் கொடுத்த காசு சுத்தம்!
உழைப்போர் என்றும் அசுத்தமா?


சூத்திரரும் வந்து சென்றால் வீட்டு
வாசல் திண்ணைதனை மாட்டு
மூத்திரத்தால் கழுவிடும் நீ - உம்
மனதை என்று சுத்தம் செய்வாய்?

Wednesday, September 27, 2006

சாமிகள் எல்லோர்க்கும் ஒன்றடா..!

சாமிகள் எல்லோர்க்கும் ஒன்றடா..!
நடுவில் தூதுசென்றிட நீயும் யாரடா? - என்மொழி
தமிழினில் அர்ச்சனை கேட்கத் தயங்கிடும்
சாமியும் ஊரினில் ஏதடா?

சமத்துவம் பேசுதல் தந்திரமோ!-இங்கு
பேதங்கள் இலையென்றோர் மந்திரமோ!
சட்டையின்றி ஓர் சகதியில் வாடிடும் சக
மானிடர் காண்கையில் சங்கடமோ!

Sunday, August 13, 2006

காக்கை குருவியும்...

காக்கை குருவியும் காட்டுக் குயில்களும்
கண்டோமே அன்றுநம் சொந்தமென! - அற்ப
மானிடரேயிதை மறந்திட்டே இன்றுநீர்
அண்டை வீட்டார்களுடன் சண்டையென்ன?

முப்பதுகோடிகள் முகம்தனைக் கொண்டுமே
வாழ்ந்தாளே பாரதத்தாய் நிம்மதியாய்!
நூறு கோடிகளாய் முகம் ஆனபோதினிலவள்
அல்லல்கள், இன்னல்கள் காண்பதென்ன?

வேற்றுமையிலொரு ஒற்றுமையாம் என்றே
பாரினில் பாரதம் திகழக் கண்டோம்! - அந்த
ஒற்றுமைக்கும் இங்கே வேட்டு என இன்று
சண்டைகள் செய்தே நாம் வீழ்வதென்ன?

Thursday, August 10, 2006

சாதிகள் இருக்குதடி பாப்பா!

சாதிகள் இருக்குதடி பாப்பா! - அவற்றை
சான்றிதழில் மட்டும்கொள் பாப்பா!
சாத்திரங்கள் தேவையில்லை பாப்பா!- விஞ்ஞானச்
சூத்திரங்கள் படித்திடடி பாப்பா!

அஹிம்சையும் நல்லதொரு வழிதான்
அதற்குமோர் அளவுகொள் பாப்பா!
தீவினை கண்டு அச்சங்கள் வேண்டாம்
தீயென எரித்திடு பாப்பா!

ஏனிந்த பேதம்?

காசு படைத்தவன் நெருங்கிய சொந்தம்- தினம்
கஞ்சி குடிப்பவன் தூரத்துச் சொந்தம் - சாமி
எல்லார்க்கும் ஒன்றெனச் சொல்லிய வேதம்
வாழும் கோவிலிலே இந்தப் பேதம்!